MHC t’ei pa tur!

22 June 2023

Boneiru ta selebrá su promé ‘Pride’ di 22 pa 25 di yüni. Nos ta privilegiá di ta un isla diverso ku ta konta ku habitantenan di tur kultura, kredo, koló i orientashon seksual bibando den union ku otro.

MHC su ambishon ta pa mehorá kalidat di bida di tur habitante di Hulanda Karibense ofresiendo kuido di salú mental na un nivel haltu. Pa nos e ta enserá tambe para ketu riba e importansia di bienestar di kada un di nos klientenan individualmente.

Esaki ta e rason pa enfatisá ku na MHC tur hende ta bon biní i ku eksklushon i deskriminashon no tin un lugá serka nos komo instituto di kuido. Ademas komo profeshonalnan nos ta konsiente ku e akshonnan negativo akí por tin efektonan desastroso riba situashon di salú mental di un persona.

P’e motibu akí durante e siman di ‘Pride’ na Boneiru nos lo hisa e bandera di inklushon LGBTQI+ (regenboogvlag) komo mensahe kla ku nos komo institushon ta inkluí un i tur sin importá orientashon i/òf identidat di género.

Durante Pride nos tambe ta selebrá huntu ku pueblo di Boneiru e bunitesa di union i diversidat pasó MHC tambe t’ei pa un i tur.

• Deel dit artikel: