Adulto (F-ACT)
Adulto (F-ACT)
MHC ta brinda abitantenan di e islanan BES kuido personalisá pa e eskala amplio di diferente problemanan síkiko i sikiátriko en kombinashon ku problemanan den otro áreanan di bida (manera bibienda, trabou i kontakto sosial). Nos punto di salida ta traha ambulante, ku un aserkamentu ku ta sostené rekuperashon i dirigí riba e nesesidat. Pa esaki ta hasi uso di entre otro e método F-ACT pa por duna e kuido mas adekuá ku ta posibel.
Grupo di enfoke
MHC por trata adultonan ku tin un kombinashon di e siguiente kehonan:
- Adikshon na sierto supstansia(nan)
- Konfushon, no por papia ni pensa na un manera ordená
- Tin pensamentunan robes (halusinashon)
- Tende kos (stèm), mira, hole, sinti òf pruf kosnan ku no tei (halusinashon)
- Tin pensamentunan straño
- Tin konflikto kada be ku otro persona
- Sintimentunan ekstremo i kambio di humor
- Kla pa reakshoná lihé, impulsivo i tin bia agresivo
- Preokupá demasiado sin ku tin motibu pa esaki.
- Atakenan di hansha repentino ku ta keda bin bek
- Sentimentu di kansansio òf fatiga
- No ta sinti emoshon
- Pensa riba morto
- Sentimentu di ta agotá i bashí
- No tin energia pa hasi nada
- Drumi malu
- Problema pa konsentrá
- Atake di yoramentu
Papia semper ku bo dòkter promé tokante di e kehonan i eventualmente pidi pa un referensia.
Dependiendo di e posibilidatnan di un kliente ta posibel pa haña sosten pa entre otro bibienda bou di guia i desintoksikashon na Sentro Nos Perseveransia na Boneiru.
Kiko nos di e tim F-ACT ta hasi?
Ora ta trata di problemanan síkiko i/o sikiátriko i/o problemanan di adikshon ku ta rekerí di tratamentu mas intensivo òf kuido riba término largu, ta forma un tim multidisiplinario amplio pa duna e tratamentu segun e método di F-ACT.
Den un tim di F-ACT diferente dunadó di kuido ta traha huntu ku otro: sikiater/dòkter, sikólogo, trahadó sosial, verplegster (sosial)sikiátriko, atministradónan di kaso (case manager), ekspertonan di eksperensia (ervaringsdeskundigen) i coach di trabou. Nan por ta enbolbí sea simultaniamente òf riba un base sirkunstansial.
E término F-ACT ta para pa: Flexible Assertive Community Treatment (Tratamentu Fleksibel Asertivo i Komunitario. E karakterístikanan di mas importante ta:
- Klientenan ta haña sosten pa por haña mas gara riba nan bida i riba loke nan tin gana di logra, redusí e kehonan i organisá yudansa práktiko pa ku e bida diario. Pa loke ta trata e último aki ta traha den intenso kolaborashon ku otro institutonan sosial.
- Ta enbolbí famia i amigunan den e kuido.
- Den kaso ku ta nesesario ta bishita e kliente den su mes ambiente (kuido ekstendé).
- Den kaso ku ta konsiderá esaki nesesario, por oumentá e intensidat di e kuido. E tim ta responsabel pa mantené kontakto i e atministradó di kaso ta esun ku ta dirigí esaki.
- Lo tin 7 x 24 ora disponibilidat
E tim di F-ACT ta traha ekstensivamente i ambulante i lo trata mas tantu ku ta posibel pa trata e kliente den su mes ambiente. Ingreso ta e último intervenshon ku lo usa. Tin bia tòg nos no por evitá ingreso di kliente. Ingreso por tuma lugá na:
– Fundashon Mariadal na Boneiru,
– Capriles Kliniek na Kòrsou,
– PAAZ CMC Kòrsou,
– PAAZ Aruba,
– Mental Health Foundation na Sint Maarten.
Tambe e tim di F-ACT ta brinda sosten konsultativo na sosionan di kadena i sistemanan rònt di e kliente. Na islanan ariba, St. Eustatius i Saba, tambe ta traha mas mihó ku ta posibel via di e método di F-ACT.
Registrashon
Pa por risibí tratamentu semper mester di un referensia di e dòkter di kas (e karta standart di referensia).
Direkshon i datonan di kontakto
Tuma nota di e informashon aki bou tokante direkshon di e diferente lokalidatnan.