Mucha i Hóben
Mucha & Hóben – Hi-5
E tim di MHC Mucha i Hóben tin komo ambishon pa tur mucha i hóben haña un chèns hustu pa nan por desaroyá nan mes den adultonan balente. MHC ta brinda kuido di salu mental pa mucha i hóben tantu na Saba i St. Eustatius komo na Boneiru. Na Saba i St. Eustatius esaki ta sosodé huntu ku un sikiater di Mucha i Hóben, un GZ-sikólogo i verpleegster (sosial sikiátriko). Na Boneiru resientemente a ekspandé e kuido ku un tim mas amplio i un sentro di tratamentu nobo nobo, ku ta karga e nòmber ‘Hi-5’. E kuido ta konsistí di diagnóstiko ambulante, tratamentu i guia di mucha i hóbennan ku un vulnerabilidat òf problema sikiátriko òf síkiko i nan famia.
Grupo di enfoke
MHC Mucha & Hóben ta pa mucha i hóben entre 0 i 18 aña ku ta eksperensia e siguiente kehonan entre otro:
- hansha, nerviosismo i tristesa;
- iritashon/ira;
- sinti su mes abatí i apátiko (depreshon);
- problema ku konsentrashon;
- problema ku drumi i/o komementu;
- problema pa asosiá ku kompañero/otronan;
- trauma òf problema pa establesé relashon sosial/emoshonal;
- adikshon, bou di kua droga-, gaming- òf adikshon na alkohòl.
Ambulante
E tim di MHC Mucha & Hóben ta purba di traha mas ambulante ku ta posibel. Ambulante ta nifiká ku e asistensia i tratamentu di e mucha òf hóben ta tuma lugá mas tantu ku ta posibel den su ambiente familiar. Banda di bishitanan na kas, konsulta/tratamentu por tuma lugá tambe na e sentro di tratamentu Hi-5 na Boneiru. Den kaso ku asistensia ambulante no ta brinda sufisiente perspektiva pa rekuperashon, por opta pa hospitalisashon den e sentro di tratamentu Hi-5.
Kiko nos ta hasi ?
E team di MHC Mucha & Hóben ta para pa un asina yamá aserkamentu sistemiko den e tratamentu di un mucha. Esaki ta nifiká ku ta involukrá henter e famia den e investigashon, guia i tratamentu. E tratamentu por tuma lugá individual òf den grupo. Ta pone tur e áreanan relevante di bida, manera enseñansa, bibienda, funshonamentu sosial i aktividatnan diario, den un kuadro. Den e trayekto di tratamentu di MHC Mucha & Hóben nos ta distinguí 3 fase: E fase di atmishon, fase di investigashon i fase di tratamentu.
Den e fase di atmishon ta atkerí informashon pa medio di kombersashonnan ku i opservashonnan di e mucha i su famia, pa asina haña un bon bista di e situashon eksistente.
Durante e fase di investigashon ta traha un kuadro ku ta inkluí tur e problemanan òf preokupashonnan ku a keda atkerí for di e kombersashonnan, tèst, opservashonnan i otro métodonan di investigashon. Ta klousura e etapa di investigashon ku un diagnóstiko.
Despues di e fase di investigashon ta sigui e fase di tratamentu. Despues ku MHC, huntu ku e mucha i su famia a stipulá metanan konkreto pa e tratamentu, den e fase aki ta bai traha na realisashon di e metanan aki. Por ta asina ku den e fase aki e mucha ta haña terapia di un sikólogo tanten ku e famia ta haña un tratamentu familiar serka e terapeuta di sistema. Ora e etapa aki keda konkluí ta finalisá e tratamentu. Naturalmente ku e parti di klousura ta inkluí un trayekto di kuido posterior.
Na momentu ku ta deliñá e trayekto di kuido posterior ta wak kon e mucha i e famia por wòrdu guia mas mihó ku ta posibel dor di un di nos sosionan den kadena.
Registrashon
Pa por risibí tratamentu na MHC Mucha & Hóben mester di un referensia di e dòkter di kas òf dòkter di mucha (karta di referensia standart). Ku esaki por registrá na e servisio di resepshon di MHC pa asina por plania e proseso di atmishon.
Direkshon i datonan di kontakto
MHC Mucha & Hóben Bonaire / Hi-5
Kaya Mendelssohn z/n
Telefòn: +599 717 0125 (bai menú: eskoho di idioma, #4 pa Hi-5)
E departamento Hi-5 ta disponibel via di telefòn di: 7or di mainta te ku 9or di anochi (djaluna te ku djabièrnè).
Pa MHC Saba & St. Eustatius, wak e direkshon i datonan di telefòn aki bou.