Boneiru

Boneiru

Boneiru ta un isla situá mas o ménos 50 kilometer for di kosta di Kòrsou, 80 kilometer for di kosta di Venezuela i 138 kilometer pariba di Aruba. Boneiru tin un largura di 38 kilometer i un anchura di entre 5 i 11 kilometer. Boneiru tin mas o ménos 15.000 habitante. Mayoria hende ta biba den e área di mas grandi kual ta Kralendijk. E promé habitantenan di Boneiru tabata e Caquetio-nan, un tribu di e indjannan Arawak di Venezuela. Probablemente nan a yega Boneiru mas o ménos 1300 aña promé ku Kristu. Na aña 1499 e spañónan a konkistá e isla i na 1636 e hulandesnan a tuma poseshon di Boneiru. Na final di siglo 17 nan a kuminsá manda hende afrikano forsa pa ta katibu pa Boneiru pa bai traha ei. E poblashon aktual ta un meskla di 80 nashonalidat i pasado étniko. Boneiru tin un ekonomia chikitu pero bibu. Mayoria di e poblashon ta traha den sektor turístiko. E industria di salu i haf di transbordo di petroli tambe ta sòru pa hopi trabou. Boneiru ta konosí komo ‘Divers Paradise’. E kombinashon di awa trankil, bon bista bou di awa, e formashon di koral i piská bunita ta hasi ku Boneiru ta e lugá ideal pa buseo!

Rincon
Rincon no ta solamente e bario ku tin e pueblo di mas bieu di Boneiru, e ta tambe esun di mas bieu di loke tabata Antia Hulandes i Aruba. Originalmente e spañónan a konstruí e kolonia akí na kuminsamentu di siglo 16. A konstruí Rincon stratégikamente den e baye, fuera di bista di potensial enemigu manera pirata i otro barku. Katibunan a yega Boneiru pa traha den kunuku òf e saliñanan na e parti sur di e isla. E katibunan tabata biba den Rincon huntu ku nan famia. Asina nan por a kana bai e saliñanan i keda ei henter e siman di trabou.

Bandera di Boneiru
E bandera ta konsistí di un triángulo hel chikí na e punta na man robes di e bandera. E koló hel akí ta representá solo i e flornan hel yamativo, ku ta sali despues di ku áwaseru kai. E parti blanku, ku ta separá e dos triangulonan, ta representá e puresa di e boneriano. Meimei di e parti blanku tin un strea kòrá ku seis punta. Kada punta ta para pa un di e barionan kaminda originalmente tabatin hende ta biba. E koló kòrá kandela di e strea ta ilustrá e karakter luchadó di e boneriano. Rònt di e strea tin un kompas pretu ku ta representá e marineronan balente ku a asistí marina hulandes den Di Dos Guera Mundial. E otro banda di e parti banku tin un e triángulo blou grandi ku ta kubri te na punta abou na man drechi di e bandera. E koló blou skur akí tei pa hende kòrda Laman Karibe ku ta rondoná e isla. (Fuete: Ofisina di turismo Boneiru)