Akuerdo di kolaborashon salú mental ABCSSS reforsá

23 April 2024

Willemstad – Dia 17 di aprel último, durante un konferensia di reino ku a tuma lugá na Kòrsou, diferente partner di salu mental den e parti Karibense di Reino a logra adelanto den nan esfuerso pa intensifiká e akuerdo di kolaborashon titulá ‘Dutch Caribbean Mental Health’ i formalisá esaki den un entidat hurídiko. Ta trata di e fundashonnan FSMA Respaldo di Aruba, GGZ Curaçao, Brasami, PSI Skuchami, Mental Health Foundation di Sint Maarten i Mental Health Caribbean.

E direktornan i direktiva di e organisashonnan a bini huntu pa partisipá na un konferensia ku a tuma lugá na Kòrsou. Tema di e konferensia tabata kuido di salu mental (GGZ) i kuido forense (FZ) i a deliberá riba e kondishonnan pa instalá un federashon. Meta di ‘Federatie Dutch Caribbean Mental Health’ ta pa promové kalidat di kuido di salú mental riba tur e islanan den Reino. E federashon lo fasilitá interkambio di ekspertisio di kontenido i e parti organisatorio. Prinsipalmente riba tereno di kalidat, kontinuo desaroyo, lei i regulashon i edukashon.

Konferensia na Kòrsou

Durante e konferensia oradornan di tur parti di Reino a kompartí nan ekspertisio i eksperensia tokante GGZ i FZ. Tópikonan ku a bini dilanti ta entre otro desaroyonan den lei, GGZ obligatorio, FZ den detenshon, kuido forense ambulante, kuido di adikshon i kuido despues di tratamentu. Meta di e konferensia tabata pa bini ku proposishonnan pa mehorá e kolaborashon entre GGZ i FZ den e parti Karibense di Reino. Konhuntamente a presentá e rekomendashonnan na e ministernan di e paisnan den Reino presente ku e intenshon pa mehorá e diferente formanan di kuido obligatorio i forense.

• Deel dit artikel: