Kuido forense

Pa klientenan ku problemanan di adikshon i/òf sikiátriko ku ta haña nan mes den problema ku hustisia, MHC ta ofresé den kolaborashon ku Stichting Reclassering Caribisch Nederland (SRCN), kuido forense. Dos case manager hudisial ta guia klientenan den nan proseso pa nan desistí di delinkuensia. Ta trata di klientenan ku ta detení den un institushon hudisial, preparando pa nan sali, òf ta trata di klientenan ku voluntariamente òf sigun indisio di hustisia (un marko hudisial imponé) ta pidi kuido.

E case managernan ta investigá huntu ku e kliente e posibilidatnan pa den futuro enfrentá su problemanan di otro manera pa por laga delinkuensia atrás. Pa un tratamentu ku ta pas ku e kuido nesesario, lo hasi uso di e oferta di kuido di koleganan di MHC. I si ta nesesario lo hasi uso ademas di otro servisionan impresindibel manera por ehèmpel riba tereno di bibienda, finansa, okupashon di dia, kapasitashon i preparashon pa trabou. Si ta posibel i e ta duna sostén, tambe lo involukrá e personanan mas importante ku ta rònt di e kliente.

E case manager forense ta keda e promé persona di kontakto ku ta vigilá, kordiná i sigui henter e trayekto. Den kaso ku tin un supervishon di rehabilitashon sosial, e asistente di reclassering i case manager lo traha huntu ku e kliente un plan di tratamentu ku áfspraknan transparente. E case manager lo kordiná ku otro partidonan, manera e Veiligheidshuis, na ora ku esaki ta importante pa un bon desaroyo di e proseso. Esaki ta nifiká un proseso di rekuperashon ku ta laga e kliente organisá su bida na su satisfakshon, sin rekaé den su komportashon deliktivo.