Lansamentu di ‘e-health’ na MHC

26 March 2021

KRALENDIJKSiman pasá a lansa uso di e-Health na Mental Health Caribbean. e-Health ta uso di internet i medionan digital pa duna sosten na tratamentu di klientenan. Ku esaki ta surpasá frontera di e islanan i klientenan por haña kuido spesialisá, sin importá riba kua isla nan ta biba. Lo tradusí un parti di loke ta ofresé on-line na mucha i adultonan na Papiamentu. E desaroyo inovativo aki ta un primisia den kuido di salubridat mental den área di Karibe.

Imaginá bo, despues di bo seshon ku un sikólogo bo kabes ta yen di tur loke boso a atendé. Ku e-Health bo por mira tur informashon trankil na kas òf riba bo telefòn. Tambe bo por yena tarea ya ora di e siguiente konsulta bo por bai mas profundo den e tratamentu. Esaki ta un ehèmpel kon e-Health ta duna sosten na kuido i ta hasi esaki mas efektivo. E tratamentu di e-Health ta un forma sientífiko probá, adishonal na e tratamentunan tradishonal face-to-face.

Therapieland, e kompania ku a ofresé e produkto, tabata enkargá ku training pa siña kon hasi uso di e-Health na MHC. Den kolaborashon ku Therapieland, MHC lo adaptá algun programa den e konteksto Karibense i tradusí na Papiamentu i Ingles Karibense (e forma di papia).

“E esensia di e proyekto ta pa via e-Health hasi e kuido nesesario aksesibel pa tur hende. Esei ta nifiká ku nos ta duna prioridat primordial na desaroyá programanan na Papiamentu. No solamente tradukshon di e teksto ta importante pero, ku guia di un video terapista Karibense, un hende mester por rekonosé su mes den e historia. Di e forma aki porfin un grupo grandi por disfrutá di un kuido efektivo”,  segun Krista Oplaat, lider di proyekto i beleidsmedewerker di MHC.Therapieland ta ofresé posibilidatnan amplio di e-Health pa kuido di salú mental. Na MHC lo usa e-Health pa ofresé tareanan i informashon komprendibel na klientenan i nan ambiente. Esaki ta hasi e trayekto di tratamentu mas efektivo i ta yuda e kliente saka mas for di e tratamentu. Dor di kombiná e-Health ku kuido regular, profeshonalnan di kuido na MHC por ofresé semper loke e kliente tin nesesidat di dje – unda ku e ta.