Mucha i Hóben

Mucha i Hóben

For di kuminsamentu MHC a ofresé kuido pa mucha i hóben na Saba i Sint Eustatius ku esfuerso i kontribushon di un sikiatra infantil i hubenil, un sikólogo di kuido di salú (GZ-psycholoog) i personal di enfermeria sikiátriko sosial.

For di sèptèmber 2016, MHC a amplia e kuido akí. E ekipo di MHC Mucha i Hóben ta ofresé awor diagnóstiko, tratamentu i guia ambulante na mucha i hóben ku tin un vulnerabilidat sikiátriko òf síkiko i na nan famia na Boneiru. Ademas di e kuido pa mucha i hóben na Boneiru, MHC Mucha i Hóben ta ofresé apoyo riba base di konsulta komo asistensia pa hóben na Saba i Sint Eustatius. MHC Mucha i Hóben banda di esaki ta dediká na prevení i señalá (for di trempan) problema síkiko i sikiátriko serka mucha, hóben i nan famia.

Den e trabou akí e kooperashon ku otro partner den kadena den kuido, enseñansa i tereno sosial ta hopi importante. Kaminda ta nesesario MHC Mucha i Hóben ta hasi esfuerso pa krea konsientisashon sosial i influensiá faktornan importante ku ta benefisiá òf stroba, e mundu (paden i pafó) di biba di mucha i hóben.

E ekipo di MHC Mucha i Hóben ta konsistí aktualmente di un sikiatra infantil i hubenil, un sikólogo di kuido di salú (GZ-psycholoog), un terapista sistemátiko i un lider di ekipo/SPV.

Vishon

E ambishon di e ekipo di MHC Mucha i Hóben ta pa promové un chèns hustu pa tur mucha i hóben pa nan por desaroyá nan mes na e mihó manera posibel, pa bira un adulto resistente. E enfoke primario den esaki ta riba mucha i hóben ku tin un vulnerabilidat sikiátriko òf síkiko. Ku otro palabra:

“Building on Fair Chances for All Youth”

Banda di fortifiká e asistensia ambulante eksistente pa hóben na Boneiru, e ekipo di Mucha i Hóben a habri un sentro di tratamentu na Boneiru na kuminsamentu di 2018. E sentro di tratamentu no ta solamente pa hóben na Boneiru, pero e ta disponibel tambe pa atmishon (risibí) di hóben di Saba i Sint Eustatius. E atmishon lo ta temporal i su funshon ta únikamente pa yuda den e proseso di tratamentu ambulante.