05 February 2025
NOMBRAMENTU PRESIDENTE INTERINO DI HUNTA DI SUPERVISHON MHC
10 January 2025
Entrante 1 di yanüari 2025, Paul Rosenmöller a keda nombrá komo presidente interino di Hunta di Supervishon di Mental Health Caribbean (MHC). E ta remplasá e miembronan di Hunta di Supervishon ku tabata den funshon te ku fin di 2024. Su tarea mas importante, ademas di supervishon, ta pa guia e prosedura pa nombramentu di un Hunta di Supervishon nobo. E Hunta di Supervision anterior tabata konsistí di presidente Jurenne Hooi i miembronan Don Olthof, Theo de Kool, Giullitta Anthony i Gerald Simmons – de Jong. E hunta kompleto a baha for di e funshon dia 31 di desèmber 2024.
Dikon un Hunta di Supervishon nobo?
Den e periodo ku a pasa, e Hunta di Supervision a reflehá riba e desaroyo di MHC. Nan a konstatá ku MHC a desaroyá den un organisashon profeshonal ku empleadonan, gerensia i e Hunta por ta orguyoso di dje. Esaki ta marka tambe un momento importante: MHC ta kla pa e siguiente fase di su desaroyo. Un promé paso importante den esaki tabata e nombramentu di un direktor nobo. Un Hunta di Supervishon ku ta funshoná bon ta keda krusial pa sostené e direktor nobo i pa guia e kresementu mas aleu di MHC. Pa krea espasio pa e transishon akí, henter e Hunta di Supervision a disidí di pone su posishon disponibel. Ademas e desishon akí tabata den liña ku e echo ku tres miembro di e Hunta di Supervishon a yega na final di nan di dos periodo, hasiendo suseshon di nan puesto nesesario. Esaki ta brinda un oportunidat úniko pa, guiá pa un presidente interino, forma un Hunta di Supervishon nobo ku ta kuadra ku e plannan di MHC pa futuro. E Hunta di Supervishon saliente a nombra un presidente interino nobo pa e tarea akí, Paul Rosenmöller.
Tokante Paul Rosenmöller
Paul Rosenmöller (1956) ta un dirigente, supervisor i polítiko eksperensiá ku lasonan fuerte den Hulanda Karibense. Su konosementu amplio, eksperensia amplio i kualidatnan di konekshon ta hasié ideal pa e puesto akí. For di 2019, e ta presidente di frakshon den Senado (Eerste Kamer). Ademas e ta presidente di e Komishon di Relashonnan den Reino di Senado (KOREL). Banda di esaki for di 2022 e ta miembro i for di 2024 e ta vise-presidente di Hunta di Supervishon di Scholengemeenschap Bonaire (SGB). Ku su añanan di eksperensia, Paul ta trese trankilidat, stabilidat i un aserkamentu di konekshon. Su konosemento amplio di i su envolvimento den Karibe, kombiná ku su liderasgo komprobá, ta duna muestra di konfiansa i integridad. E kualidatnan akí a pone ku e miembronan di Hunta di Supervishon saliente a rekomendá i nombra Paul komo presidente interino di e Hunta di Supervishon di MHC.
Gradesimentu
Nos ke gradisí Jurenne, Don, Theo, Giullitta i Gerald pa nan dedikashon i esfuersonan. Nan a hasi un kontribushon balioso na e desaroyo di MHC i nos ta apresiá nan envolvimentu mashá.
Señor Paul Rosenmöller, presidente interino di Hunta di Supervishon di MHC
Foto: Hans Kouwenhoven/Eerste Kamer
Meer nieuws
10 January 2025
24 September 2024