Akuerdo di kolaborashon salú mental ABCSSS reforsá
23 April 2024
Mental Health Caribbean ta eksistí 10 aña!
05 June 2022
Riba djárason promé di yüni Mental Health Caribbean (MHC) a selebrá su hubileo den un forma festivo i informativo na Boneiru. A dediká henter e siman na e selebrashon dor di organisá diferente aktividat, manera diferente simposio, aktividat di ‘teambuilding’, fiesta i e funshon públiko di e teater ‘Kibra Silensio’. E koleganan di Islariba, Saba i Sint-Eustatius, tambe tabata presente pa selebrá ku koleganan di Boneiru.
Mental Health Caribbean (MHC) i su predesesor ‘Stichting Verslavingszorg en Psychiatrie Caribisch Nederland’ (SVP-CN) ta eksistí for di promé di yüni 2012 i a keda realisá despues di e transformashon i ampliashon di e fundashon anterior yamá ‘Stichting Verslavingszorg Bonaire’. For di e momento ei MHC a krese bira un organisashon ku seis diferente departamento, un hunta di supervishon i den total mas ku 80 empleado.
“Den e transkurso di añanan a logra mas mihó pa baha e esfera di tabú rondó di salú mental i e relashon importante entre salú físiko i salú mental ta mas transparente. Den kooperashon ku sosionan i komunidat nos por realisá mas den kuido pa e habitantenan di Hulanda Karibense. Ban pa e siguiente hubileo!”, dje manera ei Erik Jansen, direktor-gerente MHC.
Ta habri e selebrashon ku un ‘teambuilding’ pa henter e organisashon ku pa añanan no por a sigui dor di e medidanan di corona ku a keda ahustá. Riba djárason e empleadonan di MHC ta bini huntu pa un simposio informativo ku tópikonan manera brua i sikiatria, sikósis i destigmatisashon di kuido di salú mental. Riba djaweps e kolaboradónan di e sosionan ta kordialmente invitá pa asistí na e simposio akí. Anto riba djabièrnè tin entrega di diploma pa e promé sikólogonan di salubridat di tur e islanan den reino ku a finalisá nan estudio. Ta klousurá e selebrashon di hubileo den wikènt ku e obra teatral públiko ‘Kibra Silensio’.
Kibra Silensio ta un búskeda teatral i musikal di koreógrafo Ritzah Statia na eksperensianan di hóbennan Karibense. Un presentashon kaminda ‘hiphop’ i e kultura afrokaribense ta forma e fuentenan. Ku e preguntanan sentral: Kon e generashon nobo di hóben karibense ta anda ku eksperensianan difísil i troumátiko? Krese den un sosiedat kaminda tin bia e mentalidat di “pasó mi di” i “tum’é mané e ta” ta reina. Kiko ta e efekto di esaki riba e hóben ora e madurá?
Mental Health Caribbean ke yama danki na tur su empleadonan, sosionan, klientenan i e komunidat di Saba, Sint-Eustatius i Boneiru pa e bon kooperashon i nan konfiansa den MHC i su empleadonan e último 10 añanan ku a transkurí.
