DCMH ta presentá promé bista regional konhunto di kuido pa salú mental pa parti karibense di Reino
16 September 2025
Willemstad – Pa e promé bia tin un bista konhunto riba kuido di salú mental riba e islanan karibense den Reino Hulandes. Ku e Regiobeeld GGZ Caribisch Gebied akí, e federashon Dutch Caribbean Mental Health (DCMH) ta presentá un primisia: un bista kla i komparabel di e índole i volúmen di problemanan mental den e region.
Echo memorabel den kolaborashon
E Regiobeeld GGZ Caribisch Gebied ta un paso importante pa DCMH i ta kontribuí na un mihó koordinashon i mas interkambio di konosementu. DCMH ta konsistí di e organisashonnan FSMA Respaldo (Aruba), GGZ Curaçao, Verslavingskliniek Brasami (Kòrsou), PSI Skuchami (Kòrsou), Mental Health Foundation (Sint Maarten) i Mental Health Caribbean (Boneiru, Sint Eustatius i Saba). En total a kolektá dato di kasi 8.400 kliente, repartí riba sinku isla. Mayoria kliente ta risibí kuido riba nan mes isla, un parti chikitu ta haña tratamentu riba un otro isla den Reino.
Malesanan mas frekuente
E bista di region ta mustra entre otro kua ta e malesanan mental mas komun. Trastornonan sikótiko ta na kabes. Esakinan ta malesanan kaminda hende tin difikultat pa separá realidat for di pensamentunan. Nan por eksperensiá por ehèmpel delushon òf halusinashon. Despues ta sigui trastornonan di beis depresivo. Na di tres lugá ta trastornonan di desaroyo neurobiológiko. Esakinan ta trastornonan manera ADHD òf outismo, ku hopi bia ya for di chikí ta bira visibel i tin di aber ku e manera kon e serebro ta desaroyá. Na di kuater lugá ta e trastornonan relashoná ku trouma i strès, manera trastorno di strès postroumátiko (PTSS). Esakinan ta surgi despues di susenonan impaktante òf di shòk i por kondusí na ansha, tenshon i problemanan di drumimentu. E echo ku e kuater gruponan akí ta mas komun, ta duna informashon importante tokante riba kiko kuido riba e islanan mester dirigí su atenshon mas tantu.
Base pa maneho i investigashon
Segun DCMH e bista di region no solamente ta duna un bista úniko riba kuido di salú mental den parti karibense di Reino, pero tambe un base importante pa maneho den futuro, mihó kuido i mas investigashon. P’esei e federashon a disidí pa kontinuá ku e monitòr den añanan ku ta bini.
Rei mas ariba, di robes pa drechi: Henk Kamsteeg, Denise Beeke, Caroline Hart, Kathelijne van den Boogert, Krista Oplaat, Kay-Linda Dedier, Jeroen Wisselink, Matthijs Doornbos
Rei mas abou, di robes pa drechi: Amy van der Linden, Ghislaine Cijntje-Maduro, Tineke Alberts, Indira Madhuban
Meer nieuws
