MHC t’ei pa tur!
22 June 2023
Apertura di Praktijk Resilensia
10 February 2021
KRALENDIJK – Riba 5 di yanüari último, praktijk Resilensia a habri su portanan pa mucha y adultonan na Boneiru ku tin kehonan síkiko leve te ku moderá, manera strès, problema pa drumi, ansiedat òf aflikshon. E palabra ‘Resilensia’ ta nifiká e kapasidat pa por bòns bek di e gòlpinan di bida. Esaki ta kuadra tambe ku e meta di e tratamentu di e konsultorio: pone e kliente den su forsa. E konsultorio sikológiko ta situá na Kaya P. Silié #10 na Playa pero ta risibí kliente tambe na Sentro Bon Bida na Hato.
“Manera e konosido dicho ingles ta bisa: ‘You can’t stop the waves, but you can learn how to surf’. E olanan ta simbolisá e strès, emoshon òf kambionan den bida. Nan ta keda bai bin, pero apesar di esaki ta posibel pa siña dil ku e sirkunstansianan. Esaki ta un di e prinsipionan ku Praktijk Resilensia ta para p’e”, segun Rianne Hekking, sikólogo di famia/ortopedagogo.
Den potrèt (v.l.n.r.): Shandery Rosalina, Leentje Regalis, Marielle Olaya Romero – van Overmeeren, Simone Welvaarts, Franka Locadia en Rianne Hekking.
Pa por risibí tratamentu na Praktijk Resilensia, e kliente mester di un referensia di e dòkter di kas. E tratamentu ta konsistí di un máksimo di 8 konsulta di 45 minüt; tin bia komplementá ku asistensia via di E-health (tratamentu via di internèt). Mental Health Caribbean a establesé e konsultorio riba enkargo di Zorg en Jeugd Caribisch Nederland (ántes konosí komo ZVK).
Praktijk Resilensia ta alkansabel durante oranan di ofisina via tel. +599 717 0166 òf +599 796 1132 i via di e-mail: praktijkresilensia@mentalhealthcaribbean.com.
